真相幾錢斤（上）
我叫阿強，我鍾意睇偵探小說，雖然我無去做偵探，但查案依然係我嘅愛好，興趣唔一定要變成事業嘛。
身邊嘅朋友有咩諗唔通，都會搵我查吓。
當然，大家都係平凡人，無咩生死大案，來來去去都係啲感情煩惱，但我都幫咗唔少人搵出真相，朋友都叫我「福爾摩強」。
今日，我表哥結婚，我帶埋女友琪琪一齊去飲。
婚宴仲未開始，我哋周圍同親戚寒暄。
表叔行埋嚟：「哦，呢個你女朋友啊？好襯喎。」
呢句只係普通嘅寒暄，啱啱我哋至少聽咗三十句類似嘅說話。
但突然間，琪琪面色一白，我感覺到佢隻手都震緊。
表叔完全無留意，繼續讚我高咗又靚仔咗，然後就行開咗。
我問琪琪咩事，琪琪話無事，連忙坐番低，但全身都微微顫抖。
過咗一陣，佢就話唔舒服要走先，飛也似的逃離咗婚禮現場。
我好擔心，但第二日，琪琪就完全無事，仲話尋日只係M痛。
琪琪唔知道，我對佢嘅經期瞭如指掌。
佢唔係M痛，佢係恐懼，恐懼我表叔。
琪琪同表叔有咩關係？大家可能會腦補出「琪琪做過夜總會，表叔係佢嘅客人」之類嘅劇情。
但係，我認為情況唔係咁。
首先，琪琪一見表叔就嚇到魂飛魄散，證明表叔令佢印象深刻，但表叔完全唔認得琪琪。
如果雙方拍過拖，或者有服務關係，對於對方嘅印象，唔應該相差咁遠。
而且，如果琪琪係驚表叔踢爆佢嘅壞事，咁琪琪發現表叔唔認得佢，就應該鬆一口氣；但係，琪琪依然好驚，佢對表叔嘅恐懼似乎深入骨髓。
無論作為男朋友定福爾摩強，我都想搵出真相，幫助琪琪。
某一次親戚聚會，我就藉故同表叔請教，話想轉行，但唔知做咩好。
講講吓就講到表叔做過嘅工，原來表叔以前係小學老師，我隨口問：「你教過邊間？」
表叔窒一窒，似乎唔想答，表嬸已經口快快咁講：「咪附近嗰間XX小學囉，不過做小學都唔好，是非特別多。」
表嬸講嗰間，正正係琪琪讀過嘅小學。
表叔係琪琪嘅小學老師，有咩陰影，會令到一個女仔十幾年後都仲咁驚佢？
我似乎好接近答案，我個心好沉重，但我仲有一絲希望，話唔定只係表叔當年好惡，成日鬧啲學生呢。
我去試探琪琪：「我已經知道，韋老師（表叔姓韋）當年做咗啲咩。」
琪琪好似癲咗咁撲埋嚟：「佢同你講？禽獸！佢點敢周圍同人講？無理由㗎，佢都驚㗎......」
喺琪琪顛三倒四嘅描述中，我拼湊出事情嘅真相。
嗰年琪琪十歲，生得好可愛。
韋老師係佢嘅班主任，無人估到，睇落溫和嘅韋老師，其實有戀童癖。
琪琪慘遭毒手，但佢阿媽一向保守，經常指住電視上嘅性感女星大罵：「傷風敗俗！畀個身體人哋睇，都係壞女人，應該拎去浸豬籠。」
琪琪唔想浸豬籠，所以佢唔敢同阿媽講。
見琪琪唔敢反抗，韋老師愈嚟愈肆無忌憚。
同時，可能出於補償心理，韋老師平時上堂會偏心琪琪，其他同學就有啲不忿。
加上韋老師同琪琪來往好密，就開始有女仔話，琪琪勾引韋老師，係狐狸精。
我目瞪口呆：「十歲咋喎。」
「依加啲細路好早熟。」琪琪目無表情咁講：「嗰排又有套電視劇，裡面有個八婆成日鬧人，大家都學識晒。」
後來，琪琪終於捱到小學畢業，逃出魔爪。
我火冒三丈：「我依加就去斬死個禽獸。」
琪琪拉住我，不斷問我表叔點講，我同佢坦白，表叔唔認得佢，係我自己推測出嚟。
琪琪鬆一口氣，然後睥住我：「果然係福爾摩強。」
「你放心，我會幫你報仇。」斬死表叔只係衝動說話，依加係法治社會，我哋梗係諗辦法搵證據，與十三歲以下女童性交，最高可判終身監禁㗎。
點知，琪琪講：「唔好搞咁多嘢，算數啦。」
算數？但琪琪一見到表叔，仲驚到面青口唇白，證明呢件事都令佢有好大陰影。
琪琪突然問：「你知唔知我最大嘅心願係乜嘢？」
下集：https://bit.ly/364KHQ0
將專頁設定為「搶先看」/ "See first"，最新故仔馬上睇！
有人要殺我隻狗：https://goo.gl/uZK1ag
阿媽失蹤後：http://bit.do/fiarL
#短故 #短篇 #小說 #陳美濤 #廣東話 #粵語 #tomatochan #真相幾錢斤
Search